O Concello de Poio activou o proceso para contratar as obras de transformación da antiga gardaría de Campelo nun centro destinado á atención de persoas maiores.
Desde este mércores, as empresas interesadas poden presentar as súas propostas a un proxecto que salgue a licitación cun orzamento de 1,02 millóns de euros.
O procedemento, de carácter aberto simplificado, permanecerá activo até o 10 de agosto.
Tras a adxudicación, o prazo previsto para a execución dos traballos será de sete meses, aos que se sumarán os tempos administrativos habituais.
Trátase dun proxecto estratéxico que converterá esta instalación nun espazo moderno, accesible e adaptado ás necesidades das persoas maiores do municipio, ofrecendo servizos como programas de estimulación cognitiva, rehabilitación funcional, comedor adaptado, transporte e acompañamento.
O obxectivo é facilitar unha atención profesional sen necesidade de abandonar a contorna habitual, reforzando ademais o apoio ás familias.
O Concello adquiriu a gardaría a comezos de 2024 e, a partir de entón, impulsou a redacción dun proxecto integral orientado a cubrir os coidados, actividade e socialización das persoas maiores.
A iniciativa conta con financiamento do Plan Extra da Deputación de Pontevedra, que achega preto de 807.000 euros do investimento total.
O futuro centro incluirá un espazo de uso múltiple como punto de encontro e unha ampla zona verde con campo de petanca, xogo da ra e mesas para xadrez e parchís.
Ademais, haberá unha área con salas para talleres e actividades, deseñada para evolucionar cara a un centro de día especializado na atención a persoas con deterioración cognitiva ou alzhéimer.
Engade Pontevedra Viva como fonte preferida de Google de balde
Mantente informado coas últimas noticias de actualidade.