Un canon de Costas complica as obras de recuperación da praia da Carabuxeira

O presidente de Portos de Galicia, José Antonio Álvarez, e o alcalde de Sanxenxo, Telmo Martín, mantiveron este martes unha reunión na sede do ente público para fixar as prioridades de actuación na praia da Carabuxeira, un espazo natural que leva décadas perdendo area e que se atopa en dominio público portuario.

O encontro produciuse despois de que Portos de Galicia recibise o informe de Costas do Estado, un documento que establece as condicións para ceder á Xunta os terreos necesarios para executar o proxecto municipal.

A actuación prevista polo Concello contempla a construción dun novo espigón, unha infraestrutura destinada a frear a perda de area e garantir a estabilidade da praia a longo prazo.

Para poder levar a cabo estas obras é imprescindible que os terreos, actualmente titularidade da Administración Xeral do Estado, sexan transferidos á comunidade autónoma.

Portos de Galicia solicitou a adscrición destes solos en agosto de 2024 e recibiu recentemente a resposta de Costas do Estado.

O informe fixa as condicións para o cambio de titularidade a favor da Xunta, que deberán quedar recollidas nunha acta de adscrición asinada polas administracións estatal e autonómica.

Con todo, o proceso non está exento de polémica.

Entre as esixencias do Goberno central figura a implantación dun novo canon que deberán aboar os usuarios dos terreos adscritos ao Estado, ademais das taxas habituais por concesións, autorizacións ou servizos prestados por Portos de Galicia.

A Xunta de Galicia amosou o seu rexeitamento a esta medida e advertiu do impacto negativo que podería ter na economía dos usuarios portuarios.

Segundo o Goberno galego, este novo canon non afectaría unicamente aos terreos destinados á recuperación da praia da Carabuxeira.

Tamén a outras instalacións situadas tanto en terra como na lámina de auga que non foran incluídas nos decretos de transferencia de competencias ás comunidades autónomas nos anos 80.