O verán volve poñer a proba a capacidade dos centros de acollida de animais. Aínda que os abandonos non experimentan un repunte moi acusado, si se produce unha caída nas adopcións, un fenómeno que acaba traducíndose nunha maior ocupación das instalacións.
É a realidade coa que convive nestes meses o Centro de Acollida e Protección de Animais (CAAN) da Armenteira, en Meis, onde actualmente permanecen arredor de 200 cans á espera dunha familia.
O centro, que presta servizo a 52 concellos pontevedreses de menos de 20.000 habitantes, leva máis dunha década funcionando como principal recurso público da provincia para a recollida, atención veterinaria e adopción de animais abandonados.
No que vai de ano xa atoparon un novo fogar 300 cans, unha cifra que representa o 45 % dos animais recollidos neste período.
Nos últimos exercicios, as adopcións mantivéronse nun nivel relativamente estable. En 2025 formalizáronse 512, fronte ás 616 de 2024. Aínda que o número absoluto baixou, tamén o fixeron os abandonos, pasando de 1.264 a 1.020, o que elevou a taxa de adopción do 48,7 % ao 50,2 %.
Desde a apertura das instalacións en 2013, máis de 6.000 cans abandonaron o centro rumbo a un novo fogar.
O persoal do CAAN insiste en que a adopción non consiste unicamente en elixir un animal. Antes de formalizar o proceso, os profesionais asesoran ás familias para atopar o can que mellor se adapte ao seu modo de vida, ao espazo dispoñible ou á experiencia previa con mascotas.
Os animais entréganse de maneira gratuíta, identificados con microchip, vacinados, desparasitados e esterilizados.
Un centro con atención veterinaria permanente
As instalacións do Busto ocupan preto de 10.000 metros cadrados e dispoñen de dous quirófanos, hospitalización, sala de raios X, laboratorio, módulos específicos para corentena, maternidade e animais infecciosos, ademais de espazos diferenciados para estancias temporais e prolongadas.
O funcionamento diario corre a cargo de seis operarios do servizo de recollida, dispoñibles as 24 horas, e catro veterinarios encargados da atención clínica dos animais.
Nos últimos anos tamén se reforzou o equipamento sanitario. Incorporáronse novos dispositivos para o quirófano, un autoclave para esterilización de material e sistemas de analítica sanguínea que permiten obter diagnósticos máis rápidos. Estes investimentos, xunto ás melloras realizadas nas instalacións, superan os 140.000 euros, mentres que a Deputación prevé novas actuacións nos accesos, o aparcadoiro e o laboratorio por un importe superior aos 100.000 euros.
Que ocorre cando aparece un can abandonado?
O protocolo comeza cando un Concello ou a Policía Local comunica a presenza dun animal solto. O servizo desprázase ao lugar, comproba se leva microchip e, se é posible localizar ao propietario, contacta con el para facilitar a súa recuperación.
Se o animal non está identificado, trasládase ao centro, onde recibe unha revisión veterinaria completa, vacinación e tratamento fronte a parasitos ou posibles lesións. Unha vez transcorrido o prazo legal de dez días sen que apareza o propietario, o can pasa a estar dispoñible para adopción.
No caso das persoas que perderon a súa mascota, o CAAN recomenda comunicalo canto antes ao concello ou á Policía Local, ademais de contactar co propio centro e facilitar fotografías e información que axuden á identificación.
Ademais da atención aos animais, o centro desenvolve campañas de sensibilización sobre a tenza responsable e colabora con centros educativos mediante visitas e actividades didácticas. Tamén promove a adopción a través das redes sociais, unha estratexia que nos últimos meses permitiu multiplicar a visibilidade dos cans dispoñibles grazas á colaboración con creadores de contido.
Paralelamente, o persoal elabora informes sobre a evolución do abandono, asesora aos concellos e tramita denuncias relacionadas con casos de abandono, maltrato animal ou incumprimentos da normativa sobre cans potencialmente perigosos, co obxectivo de reducir un problema que segue enchendo as instalacións cada verán.
Engade Pontevedra Viva como fonte preferida de Google de balde
Mantente informado coas últimas noticias de actualidade.