Cáritas Diocesana busca a implicación da cidadanía para poder poñer en marcha na cidade de Pontevedra un centro pioneiro na provincia, 'Santa Ana', pensado para as mulleres en risco de exclusión social.
Puxeron en marcha unha campaña de micromecenado na que piden donativos puntuais para alcanzar os 450.000 euros de prespuesto do proxecto.
O arcebispo de Santiago de Compostela, monseñor Francisco José Prieto; o presidente de Cáritas Española, Manuel Bretón; e a directora de Cáritas Diocesana de Santiago, Pilar Farjas, visitaron este luns as instalacións nas que estará o novo centro, no 46 da rúa Joaquín Costa.
Acompañoulles o director da Interparroquial de Pontevedra, Juan Carlos Abeigón, e puideron ver o avance das obras, que supoñen habilitar o espazo para dar aloxamento digno, acompañamento social e espazos terapéuticos a mulleres vulnerables da comarca.
O Centro de Acollida e Inclusión 'Santa Ana' contará con 8 habitacións, sete individuais e unha dobre adaptada para mulleres con discapacidade, todas con baño propio.
As zonas comúns están compostas por cociña, salón-comedor e sala multifuncional para terapia e acompañamento.
As instalacións contan cunha superficie total de 270 metros cadrados construídos (225 útiles), que se suman aos 1.375 de uso socioasistencial xa en funcionamento.
A diferenza do albergue temporal que ten Cáritas no mesmo edificio, este centro ofrecerá estancias prolongadas e un acompañamento integral, creando as condicións necesarias para que as mulleres poidan recuperar a súa autonomía e construír un proxecto de vida estable.
Pilar Farjas explicou que con este novo centro reforzan unha rede de recursos que permite pasar da emerxencia á integración, "ofrecendo ás mulleres vulnerables non só un teito, senón a oportunidade de refacer a súa vida. Pontevedra pode sentirse orgullosa do que aquí se está construíndo".
Este centro é a fase 3 dun proxecto global que ten Cáritas en Joaquín Costa, coa posta en marcha do albergue San Javier e do centro de atención continuada San Roque.
Para sumarse a esta campaña pódense facer doazóns a través de distintas contas bancarias indicando como finalidade 'Campaña Cáritas Sta Ana': Caixabank (BIZUM 38188), Banco Santander (ES75 0049 5557 6221 1601 6125) e Abanca (ES85 2080 5401 5930 4016 6835).
Todas as achegas contan con certificado fiscal e desgravacións de até o 80% en IRPF e o 40% en Imposto de Sociedades especificando o DNI da persoa doante.