"Síntome moi orgullosa de ver que esta provincia conta con empresas moi internacionalizadas, deste altísimo nivel de innovación e investigación", asegurou Carmela Silva na súa visita a Hifas da Terra, na que estivo acompañada polo deputado provincial Manuel González.
A presidenta foi recibida por Catalina Fernández, CEO e fundadora de Hifas da Terra, e Esteban Sinde, director de I+D+i, que explicaron con paixón as múltiples propiedades terapéuticos dos fungos e os proxectos nos que a empresa participa e a están situando como mundial líder en micoterapia.
"Hifas da Terra ten moitísimo futuro, está baseada no territorio, no que somos e en produtos como os fungos que constrúen vida e planeta, provocan benestar e saúde", remarcou a presidenta. Silva subliñou tamén a aposta da empresa pola innovación "con moitos produtos que converten a esta provincia, a Galicia, nunha grande referencia en innovación e na recreación doutro mundo onde a natureza ocupe, de verdade, un espazo importante".
Pola súa banda Catalina Fernández recordou que "levamos 23 anos de historia, investigando e construíndo o mundo da micoterapia, converténdonos nunha referencia mundial". Destacou que "temos levado esta rama da ciencia aos niveis máis altos, situando no Dicionario da Farmacia a palabra micoterapia, que mestura a micoloxía coas terapias, dotando de novas ferramentas terapéuticas aos profesionais da saúde".
Neste sentido, a emprendedora informou que "estamos a participar en ensaios clínicos do máis alto nivel" e camiñando cara a industria farmacéutica "comezando un camiño de purificación molecular, buscando novos antibióticos a partir dos fungos. Soñamos con ser un grande centro de investigación que poida aportar ao mundo novas terapias".
Hifas da Terra é líder internacional no desenvolvemento de produtos naturais destinados á saúde humana baseados en fungos medicinais. Tamén está considerada a biotech máis grande de Europa en investigación e desenvolvemento sobre setas medicinais e única en micoterapia con ensaios clínicos. A empresa aséntase na premisa de que os fungos medicinais teñen numerosos efectos positivos para a saúde humana, con centos de substancias bioactivas.
Ao longo da súa traxectoria ten recibido numerosos premios como o Premio Alimentos de España como Mellor Produción Ecolóxica en 2016 ou o Premio Cidade de Pontevedra 2012.