Carril, en Vilagarcía de Arousa, prepárase para vivir este domingo 10 de agosto o seu día grande da celebración da XXX Festa da Ameixa.
Milleiros de persoas, procedentes de distintos puntos da comarca e de fóra, daranse cita para degustar este exquisito bivalvo, recoñecido polo seu sabor e prestixio a nivel nacional.
A xornada festiva, declarada Festa de Galicia de Interese Turístico, arrincará ás 11:30 horas cuns pasacalles a cargo do grupo Xirifeiros, que animará as rúas da localidade.
O momento máis divertido do día chegará ás 12:00 horas coa lectura do pregón, que este ano correrá a cargo do actor e humorista Carlos Blanco, que anima a todos a achegarse a Carril.
Tras a súa intervención, procederase á presentación oficial da XXX edición da festa e á entrega de recoñecementos, para dar paso á actuación musical de Cristina Silva.
A partir das 12:30 horas, dará comezo a esperada degustación popular de ameixas, onde se ofrecerán elaboradas "á mariñeira" ata esgotar existencias. Os asistentes poderán acompañar este apreciado molusco das Rías Baixas cos mellores viños albariños, dispoñibles nas diversas casetas habilitadas para a ocasión.
A música continuará amenizando a xornada pola tarde, coa actuación de Pablo Balseiro e The Verbenian Orquestra, prevista para as 15:00 horas.
Aínda que o día principal é o domingo, a festa xa tivo o seu preludio este sábado 9 con diversas actividades, entre as que destacou a elaboración dunha paella xigante con ameixas e berberechos de Carril, a cargo do chef Miguel Mosteiro. A xornada previa culminou co concerto de D'Crooners Band.