A Deputación de Pontevedra culminou as obras de renovación da instalación eléctrica e do sistema de iluminación do Castelo de Soutomaior, unha actuación valorada en 1,7 millóns de euros e financiada con fondos europeos.
O presidente provincial, Luís López, visitou este martes a fortaleza para comprobar o resultado duns traballos que, segundo destacou, reforzan o papel do monumento como un dos principais referentes turísticos, históricos e patrimoniais da provincia.
Durante a visita, López anunciou que o castelo volverá abrir as súas portas ao público o próximo 6 de xullo, unha vez finalizada esta intervención.
As obras permitiron substituír por completo a instalación eléctrica do edificio, unha mellora que reducirá ao redor dun 70% o consumo enerxético.
Así mesmo, renovouse a iluminación monumental mediante a instalación de 500 novas luminarias e un sistema de control programable que permitirá adaptar a iluminación a distintas necesidades e eventos.
O presidente da Deputación subliñou que esta actuación supón un avance en materia de eficiencia enerxética e sustentabilidade, á vez que mellora a imaxe dun dos enclaves máis visitados das Rías Baixas.
López lembrou que o proxecto se suma a outras iniciativas desenvolvidas durante o actual mandato, como a mellora da experiencia dos visitantes ou a instalación de puntos de recarga para vehículos eléctricos.
O presidente provincial asegurou que a nova iluminación transformará a percepción nocturna do conxunto monumental e da súa finca, ademais de mellorar os accesos ao recinto.
Tamén avanzou que o castelo continuará acollendo unha programación cultural e turística "ampla" co obxectivo de consolidar un modelo de turismo sostible, descentralizado e vinculado ao patrimonio e ao territorio.
A actuación forma parte da estratexia da Deputación para pór en valor os castelos da súa titularidade. Neste sentido, o presidente lembrou que recentemente tamén se reabriu o Castelo de Sobroso tras un investimento de 200.000 euros.