O antigo centro de saúde de Cerdedo-Cotobade, situado en Carballedo, terá uso residencial de inmediato despois de que este mércores se entregaran por parte de Ángeles Vázquez, vicepresidenta segunda e conselleira de Medio Ambiente, Territorio e Vivenda, as vivendas protexidas a catro familias do municipio.
Estas vivendas de titularidade municipal xorden da rehabilitación deste centro que respectou a estética orixinal da fachada do edificio e mantivo o volume construtivo.
Na planta baixa sitúanse dúas vivendas de 130 metros cadrados con tres dormitorios mentres que no piso superior atópanse dúas vivendas dun dormitorio cada unha.
A adxudicación realizouse atendendo ás circunstancias de dificultade económica ou social.
As vivendas contan con calefacción e auga quente mediante bomba de calor e ofrecen tamén armarios encaixados e cociña amoblada con electrodomésticos.
Todas presentan un acceso independente a través do soportal exterior e cada unha dispón dunha praza de garaxe e xardín.
Ao acto asistían tamén o presidente da Deputación, Luis López; o delegado territorial da Xunta en Pontevedra, Agustín Reguera; e o alcalde Jorge Cubela.