Bueu vístese de morado nesta conmemoración do Día Internacional das Mulleres cunha programación que aposta por sensibilizar, educar e poñer en valor o papel das mulleres tanto na historia local como na sociedade actual.
Este venres ao mediodía na Praza do Concello, o alumnado de 3º de primaria do CPR Virxe Milagrosa liderou unha concentración conmemorativa. Neste acto, os nenos e nenas ofreceron unha sentida lectura da declaración institucional polo 8M, destacando a importancia dos coidados, e interpretaron a canción Matriarcas da artista galega Guadi Galego.
Laura Ogando, concelleira de Igualdade, abriu o acto cunha intervención na que destacou a relevancia da educación para combater a desigualdade de xénero e avanzar cara a unha sociedade máis xusta.
Ogando sinalou que, malia os avances na concienciación social, "aínda persisten actitudes e percepcións que perpetúan a desigualdade e a violencia. A loita pola Igualdade necesita continuar nos centros educativos para garantir un futuro mellor."
Un dos eventos máis destacados da programación será a ruta guiada "Mulleres da historia de Bueu", organizada polo Concello en colaboración coa Asociación A Illa dos Ratos.
O percorrido terá lugar o sábado 15 de marzo a partir das 10:30 horas e propón á cidadanía descubrir o rol clave das mulleres ao longo da historia da vila.
Figuras destacadas como Matilde Bares, mestra e pioneira na educación, ou Amalia Domínguez Búa, filántropa e empresaria, compartirán protagonismo con colectivos tradicionais como as peixeiras, as mariscadoras e as redeiras, verdadeiras representantes do matriarcado do mar. O percorrido será circular e partirá da escultura de José Solla na Praza Massó.
Óscar Rodríguez, representante da Asociación, destacou que "é fundamental poñer luz sobre as figuras femininas da nosa historia e recoñecer o seu impacto social".
GASTRONOMÍA EN FEMININO
O protagonismo das mulleres espállase tamén ao ámbito gastronómico coas 'III Xornadas Gastronómicas en Feminino'. Do 8 ao 15 de marzo, doce locais da vila participarán nesta iniciativa creando tapas inspiradas na cociña de Amelia González, fundadora do recoñecido restaurante Casa Solla. Con este proxecto, non só se busca dinamizar a gastronomía local, senón tamén visibilizar a realidade de que máis do 80% das cociñas da restauración están lideradas por mulleres.
A aposta cultural e educativa polo 8M complétase cunha serie de actividades pensadas para diferentes públicos. O Cineclub Bueu proxectará o filme Matronas o 14 de marzo no Centro Social do Mar, unha obra que reflexiona sobre os desafíos das profesionais da sanidade. Ademais, o domingo 16 terá lugar a Milla pola Igualdade, organizada polo Club de Atletismo Galaicas, con sesións de zumba, fitness e unha carreira simbólica que busca visibilizar que "a Igualdade é a meta."
Por outra parte, nos centros educativos da vila estase a desenvolver un ciclo de cine con perspectiva de xénero, co obxectivo de fomentar o debate e a reflexión crítica entre o alumnado. Tamén se están a levar a cabo talleres de autoestima e autocoidado, organizados por colectivos locais como a Asociación de Mulleres Rurais Mar e Agro.