O Concello de Cerdedo-Cotobade acaba de dar luz verde aos seus orzamentos para 2025, que alcanzan unha cifra nunca vista até agora: 5.755.000 euros.
Desde o goberno local non dubidan en cualificalos como "os máis ambiciosos da historia recente", non só polo seu volume, senón polo forte impacto social que terán e todo iso sen recorrer á débeda.
O alcalde, Jorge Cubela, asegura que estas contas reflicten "un proxecto sólido e comprometido coas persoas, que reforza os servizos públicos e segue transformando o municipio".
Ademais, destacou o esforzo do equipo de goberno para aumentar recursos sen endebedarse nin pór en risco a estabilidade económica.
Un dos grandes titulares do novo orzamento é o incremento do 20% en gasto social, con especial atención ao Servizo de Axuda no Fogar (SAF) e a mellora da atención a persoas maiores e dependentes.
Na área de persoal, consolídase tamén a nova Relación de Postos de Traballo (RPT), que permitirá mellorar os servizos municipais con máis recursos humanos, actualizando categorías e retribucións para o plantel do Concello.
A cultura e o deporte tamén teñen o seu espazo, con 200.000 euros destinados a actividades e axudas directas a asociacións culturais, deportivas e educativas, incluíndo ás ANPAS dos colexios do municipio.
O goberno local destaca outro logro importante como é o conseguir mobilizar máis de 14 millóns de euros en proxectos financiados pola Xunta de Galicia e a Deputación de Pontevedra, que levarán a cabo ao longo de 2025.
"Este orzamento consolida un modelo de xestión eficiente e responsable, sen endebedamento e cun uso rigoroso dos recursos públicos", subliñou Cubela.
VIVENDAS PROTEXIDAS
Na mesma sesión plenaria, aprobouse tamén a expropiación de nove parcelas na Igrexa, na parroquia de San Xurxo de Sacos, para destinar eses terreos á construción de sete vivendas de promoción pública.
A proposta, que conta cun orzamento de 87.191 euros, permitirá ao Concello ceder o solo ao Instituto Galego da Vivenda e Solo (IGVS), encargado de executar as vivendas.
O proxecto foi declarado de utilidade pública e interese social, xa que busca facilitar o acceso á vivenda, especialmente para familias, e favorecer o desenvolvemento demográfico e económico da zona.
A medida foi aprobada coa maioría dos votos a favor do Partido Popular e do BNG e a abstención do PSOE.