O alcalde de Vilaboa, César Poza, e a concelleira de Promoción Económica, Carmen Gallego, mantiveron este mércores 7 en Madrid unha xuntanza co secretario de Estado de Medio Ambiente, Hugo Morán.
O encontro centrouse na procura de solucións para os núcleos costeiros do municipio afectados pola aplicación da Lei de Costas.
A reunión forma parte dun proceso que o goberno local vén desenvolvendo desde hai meses, tanto a nivel municipal como autonómico, co obxectivo de desbloquear a situación e defender os dereitos da veciñanza.
Segundo informa o Concello, estas accións permitiron formular varias alternativas técnicas e administrativas que poderían contribuír a atopar unha saída ao conflito actual.
Porén, o avance real destas propostas depende do apoio explícito da Xunta de Galicia.
Por ese motivo, o Concello solicitará unha nova xuntanza coa directora xeral de Urbanismo da Xunta para revisar as posibles solucións e fortalecer a colaboración entre as diferentes administracións implicadas.
O executivo reafirma que continuará traballando con rigor, diálogo e lealdade institucional para acadar unha resposta definitiva que protexa os intereses do litoral de Vilaboa e poña fin á incerteza legal que afecta os habitantes dos núcleos costeiros.
O Concello subliña que manterá as xestións e contactos necesarios ata garantir a seguridade xurídica para a veciñanza afectado.