O Concello de Vilagarcía di basta tras acumular actos vandálicos á decoración do Nadal instalada no municipio.
Desde o goberno local chaman ao civismo da poboación asegurando que uns poucos "non poden danar o esforzo económico e a dedicación do persoal do concello que a inmensa maioría si respecta e valora".
Nesta ocasión o "enésimo" acto vandálico produciuse na bóla que decora o cruzamento do Río con Valentín Viqueira.
Explica o Concello que usando material combustible alguén realizou tres buracos na capa de plástico producindo importantes danos.
Isto súmase outros actos similares rexistrados en días anteriores en mobiliario urbano e outros elementos ornamentais.
Por ese motivo desde o executivo local piden respecto polo investimento realizado na decoración.
Tamén polos xardíns efémeros ou a Aldea de Nadal ademais de cara ao esforzo dos empregados públicos encargados de facelos realidade.
"Contamos con que sempre haberá unha minoría que vai estar en contra, pero iso non nos debe desviar do fundamental: hai unha inmensa maioría que celebra e respecta o que se fai, demostrando que o civismo é parte fundamental do modelo de cidade que defendemos", sinalan desde o Concello de Vilagarcía.