Churruchaos, recuperado como sede dos servizos técnicos municipais tras un investimento de 1,5 millóns

O delegado do Goberno en Galicia, Pedro Blanco, visitou este luns as obras de rehabilitación integral do edificio administrativo de Churruchaos, unha actuación financiada na súa maior parte con fondos europeos Next Generation e enmarcada no Programa de Impulso á Rehabilitación de Edificios Públicos (PIREP).

Acompañado polo alcalde de Pontevedra, Miguel Anxo Fernández Lores, o delegado destacou que a intervención é un exemplo dunha política orientada á eficiencia, a sustentabilidade e o reforzo dos servizos públicos desde o ámbito local. Durante a visita, subliñou que a recuperación do inmoble responde a un modelo que busca "pór os edificios públicos novamente ao servizo da cidadanía".

A reforma, executada pola empresa Cíes, contou cunha achega estatal de 776.097 euros, o que supón cerca do 61 % dun orzamento total que rolda os 1,5 millóns de euros. A obra foi financiada a través do Ministerio de Transportes e sufriu dúas prórrogas de prazo debido á demora na obtención de permisos de comunidades de veciños lindeiras e ao colapso da cuberta do edificio.

Segundo explicou o delegado do Goberno, esta actuación forma parte dun plan máis amplo que en Galicia mobiliza máis de 50 millóns de euros en 49 proxectos estratéxicos. No caso concreto de Pontevedra, o Estado destinou 3,5 millóns de euros á rehabilitación de Churruchaos, á conversión do antigo conservatorio nun polo de economía social e a melloras no CEIP Daría González.

Pedro Blanco sinalou que a intervención simboliza como o Plan de Recuperación está "a transformar Galicia desde o local" e defendeu que os fondos europeos están a contribuír a modernizar os servizos públicos e o parque de edificios administrativos.

Pola súa banda, o alcalde de Pontevedra valorou positivamente unha rehabilitación que cualificou de especialmente complexa e afirmou que supón "un antes e un despois" nos edificios administrativos municipais. Fernández Lores destacou ademais o impacto do PIREP na recuperación de inmobles históricos e asegurou que, sen este apoio financeiro, o Concello non podería afrontar en solitario proxectos desta envergadura.

O rexedor tamén avanzou que os fondos do programa EDIL xa están consignados: 8,7 millóns de euros de financiamento europeo que, sumados á achega municipal, alcanzarán os 14,5 millóns e permitirán desenvolver actuacións orientadas a mellorar a calidade de vida da cidadanía.

A reforma do edificio de Churruchaos introduciu melloras significativas en accesibilidade, como a instalación dun ascensor, que antes non había, e a substitución das antigas escaleiras por outras máis abertas. A intervención potenciou ademais a entrada de luz natural, tanto desde a fachada como desde un tramo acristalado da cuberta. O inmoble incorpora acabados en madeira, mobiliario a medida e elementos artísticos, con reproducións de obras de Seoane e do artista pontevedrés Carlos Sobrino.

"Cáusame unha impresión incrible. Ten unha luz impresionante. Eu pateei este edificio antes e patéoo agora e non ten absolutamente nada que ver", manifestou Lores durante a visita.

"Este é o exemplo máis claro de que os fondos de recuperación están a modernizar e cambiando Galicia", sinalou o portavoz estatal.

O edificio converterase na nova sede dos servizos técnicos do Concello de Pontevedra. Departamentos como Arquitectura, Enxeñaría e Patrimonio, actualmente situados na Casa Consistorial, trasladaranse a estas dependencias a partir do próximo mes de xaneiro, unha vez finalizadas as festas do Nadal. En cambio, os servizos de Cultura, Normalización Lingüística, a Dirección Xeral de Protección Cidadá e o grupo municipal do PSOE non regresarán a este inmoble tras a reforma.