A Confederación Intersindical Galega (CIG) convoca para o vindeiro 8 de marzo, Día Internacional da Muller Traballadora, unha manifestacións que partirá ás 12:00 horas dende o edificio sindical.
Baixo o lema "Traballo, Igualdade e Salarios Dignos, nunha Galiza con dereitos", a central sindical reafirma o seu compromiso coa loita feminista no ámbito laboral.
No acto de presentación deste xoves 6, participaron Marta Ferreiro, Cecilia Pareda, Diana Rodríguez e Soledad Fernández, que expuxeron as principais reivindicacións da CIG para esta xornada de mobilización.
A reivindicación céntrase na necesidade de garantir condicións laborais equitativas. A pesar dos avances lexislativos en materia de igualdade, a realidade amosa unha fenda salarial persistente e unha infravaloración dos traballos feminizados.
Marta Ferreiro destacou que "o 8M non pode desvincularse da súa orixe obreira nin das loitas que aínda quedan por conquistar".
A desigualdade reflíctese nunha fenda salarial do 18,4%, que se traduce en case 4.700 euros brutos anuais menos para as mulleres en comparación cos homes. No caso das pensións, a diferenza alcanza o 33,6%, o que supón unha perda de 421,38 euros mensuais.
Para reducir estas desigualdades, a CIG propón unha subida do salario mínimo interprofesional ata o 60% do salario medio estatal, seguindo as recomendacións da Carta Social Europea.
A precariedade laboral afecta especialmente ás mulleres, cunha maior taxa de contratación parcial e temporal. Segundo datos da Axencia Tributaria, a diferenza salarial reduciríase ao 7,7% se as mulleres traballasen a tempo completo durante todo o ano.
Cecilia Pareda sinalou que "a parcialidade imposta e a temporalidade son os principais factores que alimentan a fenda salarial".
Ademais, dende a CIG exprésase un rexeitamento ao cobro do IRPF sobre o salario mínimo interprofesional, considerando que esta medida castiga os sectores máis vulnerables.
Para combater estas desigualdades, a CIG propón unha serie de medidas para avanzar na igualdade laboral. Unha das propostas é a redución da temporalidade e da parcialidade na contratación, especialmente entre a mocidade.
Tamén reclama a mellora das auditorías retributivas e dos plans de igualdade, asegurando que identifiquen as causas reais das fendas salariais e das discriminacións laborais.
A central sindical demanda, ademais, o reforzo da Inspección de Traballo para garantir o cumprimento normativo e a igualdade salarial.
Outra medida clave consiste nunha clasificación profesional xusta e equitativa que recoñeza o valor real dos traballos feminizados, como os coidados e a limpeza, cunha retribución acorde á súa importancia social.
A CIG tamén propón a ampliación dos permisos de maternidade e paternidade e o dereito á adaptación dos horarios laborais para favorecer a conciliación.
Ademais, defende a creación de servizos públicos de coidados accesibles e suficientes para que ningunha muller teña que renunciar ao seu emprego por falta de alternativas.
Tamén se reclama a imposición de sancións exemplares ante casos de discriminación, acoso e violencia laboral.
Outro punto fundamental é a equiparación das pensións mínimas co salario mínimo interprofesional, garantindo a súa actualización conforme ao IPC.
A CIG chama á mobilización durante a mañá do 8 de marzo e tamén pola tarde, en coordinación co movemento feminista galego.
En Pontevedra, esta manifestación partirá ás 17:00 horas dende Eduardo Pondal, percorrendo diversas rúas ata a casa consistorial, onde se dará lectura ao manifesto.
No marco das mobilizacións obreiras, o sindicato tamén anuncia actos parao 10 de marzo, o Día da Clase Obreira Galega.
En Pontevedra, a concentración desa xornada terá lugar ás 20:00 horas na Praza da Peregrina, mentres que en Vilagarcía, o punto de encontro será a Casa do Mar a mesma hora.