O Hotel Carlos I Silgar, a confeitería A Ponte, o restaurante Carmen, Adega dos Eidos e o taxista Otilio Prieto foron o primeiras cinco empresas locais que se fixeron co premio Sanxenxo, Calidade Turística 2015, que se entregou este luns na Sala Nauta.
O acto contou a presenza de Isabel Borrego, secretaria de Estado de Turismo; Nava Castro, directora da Axencia de Turismo da Xunta; Santos Héctor, deputado de Turismo; o alcalde de Sanxenxo, Gonzalo Pita; e o presidente do Cluster de Turismo e do CETS, Francisco González.
Estes cinco proxectos empresariais son as empresas seleccionadas pola Mesa da Calidade Turística de Sanxenxo que o pasado ano decidiu crear estes premios para destacar o bo traballo realizado polos establecementos locais.
Tras a entrega dos premios 'Sanxenxo, Calidade Turística' comezou a entrega dos diplomas e distintivos Sicted a un total de 43 empresas este ano, 17 das cales o conseguen por primeira vez.
Foi Gonzalo Pita quen introduciu esta entrega e na súa intervención lembrou que Sanxenxo leva traballando como xestor do Sicted, Sistema Integral de Calidade Turística en Destino, desde o ano 2005, creando a Mesa para a Calidade Turística de Sanxenxo, co obxectivo de facilitar a participación e colaboración de todos os sectores económicos e servizos públicos na xestión do Sicted.
O alcalde lembrou tamén que 11 anos despois Sanxenxo conta con 113 empresas e servizos públicos distinguidos e 10 novas empresas adheridas que desexan empezar este ano traballando en Calidade Turística. Ademais do Sicted, Sanxenxo ten 35 empresas con Q de Calidade Turística, e todas elas proveñen do Sicted.
Os representantes municipais, autonómicos e estatais destacaron durante as súas intervencións a aposta decidida do sector turístico local pola calidade como sinal diferenciador á hora de competir con outros destinos.