Como cada ano, Marín volverá ter unha cita coa súa memoria histórica o 31 de decembro.
O mércores 31, ás 13 horas, terá lugar no Paseo Alcalde Antonio Blanco o acto organizado pola ARMH de Marín en homenaxe e lembranza dos fusilados ese mesmo día de 1936.
Trátase de Albino Agraso Santamaría, Antonio Blanco Solla, Amando Iglesias Pérez, Demetrio Lorenzo Ordóñez, Santiago Ramos Ramos e Bernardino de la Torre Fernández.
O acto tamén terá este ano unha lembranza especial a Pablo Iglesias Posse, fundador do PSOE e de UGT, con motivo do centenario da súa morte o 9 de decembro de 1925.
Lembrarán, así, que algúns dos marinenses homenaxeados tamén formaban parte de agrupacións ou federacións sindicais; organizacións que sufriron de forma cruenta a represión e persecución franquista.
Guillerme Pérez Agulla, director da Fundación Luis Tilve, terá a intervención central do acto, enmarcado na conmemoración do centenario do pasamento deste histórico político e sindicalista.
No acto intervirán tamén a presidenta da asociación, Queta Otero; e Xulio Pardellas e Uxía Lubián.
O acto contará coa colaboración musical de Zeltia Acuña e coa presenza de familiares dos homenaxeados, que participarán na tradicional ofrenda floral.