Os servizos de emerxencia interviñeron este mediodía no peirao das Corvaceiras tras a caída dun vehículo ao mar.
O incidente produciuse ás 15.43 horas e, afortunadamente, non provocou danos persoais, xa que no interior do automóbil non había ningunha persoa no momento do suceso.
Segundo informaron fontes da intervención, foi un particular quen alertou da caída do vehículo á auga.
Pouco despois, outra persoa lanzouse ao mar para comprobar si había ocupantes atrapados. Tras unha primeira inspección e a posterior revisión realizada polos equipos de emerxencia, confirmouse que o coche estaba baleiro.
Até o lugar desprazáronse efectivos do Servizo Municipal de Bombeiros e da Policía Local de Pontevedra.
Os bombeiros, en coordinación con Salvamento Marítimo, procederon a asegurar o vehículo para evitar novos riscos e facilitar os labores de recuperación.
Os propietarios do automóbil son dous turistas xóvenes que, segundo explicaron aos axentes, xa non se atopaban na zona cando o coche caeu á auga. A moza propietaria mostrouse moi nerviosa tras coñecer o ocorrido.
As causas do incidente aínda non foron determinadas, aínda que as primeiras comprobacións realizadas pola Policía Local apuntan a unha posible falta de inmovilización axeitada do vehículo.
Os axentes observaron que as rodas non estaban bloqueadas, unha circunstancia que podería indicar que o freo de man non quedou correctamente accionado.
Ademais, o coche aparentemente non tiña unha marcha engranada, un elemento que contribuiría a mantelo inmobilizado, especialmente nunha zona con pendente próxima ao bordo do peirao.
