O Movemento Galego en Defensa das Pensións Públicas (Modepen) e a Coordinadora Estatal en Defensa das Pensións Públicas fan un chamamento aos pontevedreses a que secunden a súa próxima protesta, unha concentración convocada para este sábado 15 de decembro que, como novidade, "abre o abano" das súas reivindicacións e sae en defensa de todos os servizos públicos.
Os dous colectivos convocantes fixeron extensiva a convocatoria a outras entidades pontevedresas que traballan no ámbito dos servizos sociais, que xa lles trasladaron o seu apoio e cos que, de feito, xa levan traballando bastantes meses nunha estratexia de loita conxunta.
Victoria Portas e Manuel Alfonsín, de Modepen, presentaron este mércores esta concentración, prevista para as 12.00 horas do sábado 15 na praza de España e que se realizará de xeito simultáneo en 25 cidades e vilas galegas e unas 150 de toda España. entre elas, Vigo ou Cangas.
Os voceiros de Modepen explicaron que esta protesta será a primeira na que seguirá a que xa será a súa estratexia de traballo de cara ao ano 2019, unha defensa xenérica dos servizos sociais que se fai necesaria "dadas as circunstancias que estamos a vivir, os recortes continuados en sanidade, os recortes continuados en educación, en dependencia..." e tamén "á vista de que os orzamentos de 2019 non queren ser aprobados polo arco parlamentario".
"Non queremos parcelar a loita da clase obreira", defende Victoria Portas, que tamén avanza que durante o próximo ano 2019 desde estes dous colectivos de pensionistas "non estamos dispostos a que siga sucedendo o mesmo que en 2018, que nos limitemos ao conflito en Cataluña mentres o resto da cidadanía pasa fame e situacións de subsistencia que non se poden seguir asimilando".
Respecto disto destacan que neste momento "a prioridade da cidadanía é comer e vivir e iso son servicios sociais" mentres que a clase política deste país "quere tapar directamente con conflictos como o de Cataluña, que nada ten que ver co resto do territorio", de maneira que desde os seus colectivos anuncian que van "seguir metendo presión".
Manuel Alfonsín quixo advertir que a situación que se está a xerar pode derivar en acontecementos como o que está a suceder estes días en Francia. Aínda que confían en que non chegue tal momento "porque nós non somos violentos, non temos ganas de facer follóns", si chama a atención sobre a posibilidade de que sexa realidade en España ou calquera outro país.