A sarabiada que caeu no mediodía deste martes na zona de Arousa provocou un accidente en Vilanova.
Consistiu nunha colisión múltiple con catro vehículos implicados na que, finalmente, resultaron feridas tres persoas.
Segundo a información facilitada polo 112 Galicia, ocorreu no quilómetro 1 da PO-306, ao seu paso por Vilanova de Arousa, dez minutos despois deste mediodía.
O 112 Galicia tivo constancia dos feitos a través dun particular, que explicou que chocaran catro coches e que estaba a caer unha forte sarabiada.
A Policía Local confirmou os feitos e solicitou a colaboración no punto dos servizos de mantemento da estrada.
Aínda que nun principio se sinalou que non había persoas feridas, os servizos sanitarios tiveron que trasladar finalmente a tres persoas a un centro hospitalario.
O accidente tamén supuxo mobilizar á Garda Civil de Tráfico e a agrupación de voluntarios de Protección Civil de Vilanova.