A concelleira de Seguridade Cidadá do Concello de Pontevedra, Eva Vilaverde, explicou este mércores a loxística preparada para proceder á demolición das partes que os técnicos municipais e os bombeiros consideraron inseguras do edificio incendiado na madrugada do martes no número 4 da rúa Riestra.
Durante a mañá retiráronse partes da cuberta, que ten diferentes láminas, "xa que se detectou que, unha vez máis, empezaba a saír fume" debido a que ese tipo de panel sándwich "mantén moita calor e por tanto é moi difícil de apagar".
Así, os bombeiros do parque municipal de Pontevedra trataron de facilitar a tarefa dos operarios da empresa de demolición, quitando esas partes da cuberta para poder arrefriar o tellado antes de suspender cun guindastre un colector de obra á altura da fachada para iniciar a retirada dos distintos elementos.
"Xa se comprobou a estabilidade das medianeiras e os técnicos municipais consideraron que non corre perigo de derrube", indicou.
Está prevista a demolición da bufarda que é a que máis perigo representa ante o risco de colapso. A previsión é que os traballos se poidan prolongar tres días.
Segundo a información facilitada polo Concello, a media tarde retiráronse os bombeiros, unha vez que o lume se deu xa por extinguido e a empresa de demolición retirou parte da cuberta e refrescou a zona máis inaccesíbel.
A empresa continuará traballando na mañá do xoves, "pouco a pouco", para evitar o colapso da cuberta.
A zona permanece totalmente valada para impedir o acceso de persoas alleas aos traballos.
Está prevista a presenza da Policía Local durante a noite para supervisar a zona, xa que está baixo mandato policial e aínda hai que rematar a investigación policial.
INVESTIGACIÓN
Eva Vilaverde tamén informou que os axentes da Policía Científica tampouco puideron acceder ao lugar para investigar a orixe do incendio xa que os Bombeiros non permitiron a entrada destes especialistas da Policía Nacional ao non poder garantir a súa seguridade.
VECINOS AFECTADOS
A concelleira de Seguridade, Eva Villaverde, tamén informou que xa se autorizou o regreso ás súas vivendas por parte dos veciños dos edificios lindeiros que foran desaloxados por mor deste incendio.
En canto aos residentes no edificio sinistrado, segundo detallou Eva Vilaverde, hai oito persoas que seguen realoxadas nunha vivenda titularidade do Concello de Pontevedra.
Estas persoas están a ser atendidas polos Servizos Sociais municipais, con asignación dunha traballadora social, "iranse analizando as necesidades de cada un deles para ver que recursos téñense que pór a disposición", manifestou.
Ademais, o tres locais afectados dos baixos do edificio mantéñense precintados por agora do mesmo xeito que a rúa que seguirá cortada.