Este luns, 2 de marzo, comezan en Vilagarcía de Arousa as obras de acondicionamento do novo acceso á Vía Verde do Salnés, unha intervención chamada a mellorar de maneira substancial a accesibilidade deste itinerario que se ten consolidado como referente do turismo activo en Galicia.
A empresa Construcciones Vales, SL disporá de dous meses para executar un proxecto orzamentado en 200.000 euros, financiados con cargo aos fondos europeos Next Generation.
A actuación suporá a incorporación de 271 metros adicionais ao trazado actual, que conta con 9,2 quilómetros e conecta a cidade coa antiga azucreira de Portas seguindo o percorrido da histórica liña férrea inaugurada en 1899 para prolongar o tren desde Carril ata Pontevedra.
Ese pasado ferroviario, aínda visible en distintos elementos do camiño, forma parte da identidade dunha vía que foi a primeira construída integramente en territorio galego.
O obxectivo principal das obras é eliminar barreiras. Ata o de agora, o acceso realizábase pola rúa do Río, cunha pendente pronunciada que dificultaba o paso a persoas con mobilidade reducida, carriños infantís ou ciclistas menos experimentados. O novo punto de entrada, situado na rúa Charco, contará cunha rampla de inclinación moi suave que permitirá un tránsito cómodo e seguro para todos os públicos.
O proxecto foi deseñado polos técnicos da Fundación de los Ferrocarriles Españoles, responsables tamén do deseño orixinal da vía, o que garante a continuidade estética e funcional do conxunto.
A intervención inclúe a retirada dos traveseiros e do terraplén de pedra que aínda se conservan da antiga infraestrutura ferroviaria, para transformalos nun camiño de terra compactada acorde co resto do itinerario.
As obras coinciden cun novo recoñecemento para a ruta como é a renovación, por terceiro ano consecutivo, da Bandeira Sendeiro Azul que concede a Asociación de Educación Ambiental y del Consumidor, entidade que tamén xestiona as coñecidas bandeiras azuis das praias co aval da Unión Europea.
O distintivo foi ratificado igualmente para a ruta mariñeira que une Vilaxoán e Carril pola costa.
Para o goberno local do Concello de Vilagarcía, a coincidencia entre a mellora da accesibilidade e o aval externo supón unha dobre satisfacción xa que significa avanzar cara a unha vía máis inclusiva e consolidar, ao tempo, a imaxe da Vía Verde do Salnés como un dos grandes atractivos do turismo sustentable en Galicia.
Engade Pontevedra Viva como fonte preferida de Google de balde
Mantente informado coas últimas noticias de actualidade.