A sección sindical de Comisións Obreiras da Deputación de Pontevedra compareceu en rolda de prensa para criticar á presidenta da administración provincial, Carmela Silva, xa que entenden que no tema da igualdade e a violencia de xénero "o que está a facer a presidenta é unha campaña de promoción persoal".
Segundo afirmou o delegado de Comisións Obreiras na Deputación, José Ramón Piñeiro, "gustaríanos unha presidenta non que dixese o que pensa senón que fixese o que di" polo que esixiu "medidas concretas" de fomento da igualdade.
Asegura este sindicato que as políticas que está a impulsar o goberno provincial bipartito sobre esta materia "lévanos a un gasto importante de diñeiro que non redunda na práctica en nada de prevención para as mulleres maltratadas nin no tema da igualdade".
A maior crítica de Comisións Obreiras diríxese á ausencia dun Plan de Igualdade porque "se está a incumprir a legalidade" xa que este documento é obrigatorio como sinala un Real Decreto do 4 de agosto do ano 2000, motivo polo que a Inspección de Traballo abriu un requirimento "por unha infracción moi grave" á administración provincial no ano 2014, estando gobernada a institución polo Partido Popular.
Comisións Obreiras explicou que durante o mandato de Rafael Louzán chegouse a crear un grupo de traballo para a elaboración dun Plan de Igualdade "pero as eleccións municipais e logo as sindicais" foron demorando este traballo ata que o goberno bipartito decidiu contratar a unha empresa privada que agora está a realizar un diagnóstico de situación para presentar o próximo mes de abril este conxunto ordenado de medidas.
Esta contratación "preocúpanos", indicou Ángela Comesaña de Comisións Obreiras.
José Ramón Piñeiro tamén criticou que o Servizo de Igualdade, posto en marcha por primeira vez na Deputación polo bipartito, "só teña contratadas a mulleres".
Este sindicato insta o goberno provincial a que "axilice" a elaboración do Plan de Igualdade, que cre tribunais de selección paritarios, habilitar módulos de formación en igualdade e tamén "instaurar un protocolo de acoso sexual".
Finalmente, o delegado de Comisións Obreiras na Deputación, pediu ao goberno provincial "que deixe de dicir que as competencias son da Xunta" e que poña en práctica "accións concretas" contra a violencia de xénero. Entre outras, piden que se destine a prevención unha parte do orzamento provincial, e que se destine para a acollida ás vítimas dos malos tratos dous pisos que ten a institución no barrio de San Antoniño en Pontevedra e tamén as vivendas que hai no Centro Príncipe Felipe.