O Concello de Caldas de Reis inicia a conta atrás para as celebracións de San Xoán e San Pedro animando a veciñanza a manter vivas estas tradicións cumprindo as medidas básicas de seguridade para que a festa transcorra sen incidentes.
O tenente de alcalde encargado de Festas, Manuel Fariña, lembra que para poder realizar as fogueiras en terreos privados, as persoas particulares deberán comunicalo á administración local antes do día 19.
Para realizar o trámite é necesario presentar a documentación no Rexistro do Concello, de luns a venres entre as 9:00 e as 14:00 horas, ou de forma online a través da web municipal.
Para completalo, os interesados deberán achegar a localización exacta da fogueira nun plano catastral que poderán descargar a través da sede electrónica do Catastro.
A relación das fogueiras autorizadas será publicada, como moi tarde, o 23 de xuño antes das 15:00 horas.
Así mesmo, desde o Concello lembran que a seguridade debe ser unha prioridade, polo que as fogueiras terán que situarse a unha distancia segura de vivendas, vehículos, mobiliario urbano, zonas con vexetación, tendidos eléctricos ou calquera instalación que poida verse afectada polo lume.
As persoas organizadoras deberán dispor de medios para apagalo, como caldeiros de auga, area ou extintores, e deberán asegurarse de que o lume quede completamente apagado antes de abandonar o lugar.
As fogueiras só poderán estar acendidas entre as 20:00 e as 3:30 horas e, en caso de vento forte ou condicións meteorolóxicas adversas, non se poderá prender.
O tenente de alcalde Manuel Fariña agradece a colaboración e fai un chamamento ao sentido común e á responsabilidade para gozar dunha das noites máis especiais do ano con todas as garantías de seguridade.