O Concello aclarou este luns que a denuncia presentada polo grupo municipal do PSOE sobre o elevado número de horas extra atribuídas a un funcionario municipal débense a un erro tipográfico nun informe interno.
Tras revisar a documentación cos servizos técnicos de Intervención, comprobouse que faltaba unha coma na cifra reflectida.
Deste xeito, non se trataba de 1.405 horas extraordinarias, senón de 140,5 horas.
Segundo o Concello, o erro non tivo ningún efecto nin na contabilización total das horas nin na remuneración percibida, que se correspondeu en todo momento coas 140,5 horas correctas.
Desde a administración local sublíñase que esta situación entra dentro da "normalidade" no funcionamento das brigadas municipais, cuxo traballo resulta esencial para a prestación dos servizos públicos. Nestes postos, explican, a presencialidad e a dispoñibilidade forman parte inherente da actividade diaria.
Enterradores, peóns e oficiais das brigadas de Obras, Augas e Electricidade, así como efectivos da Policía Local, presentan mensualmente relacións de horas extraordinarias motivadas por imprevistos, incrementos puntuais de traballo derivados de festividades ou eventos, ou baixas repentinas de persoal.
O Concello quixo agradecer publicamente a implicación e o esforzo de todo este persoal municipal no desempeño das súas funcións.
A alcaldesa de Marín, María Ramallo, saíu ao paso da denuncia formulada por PSOE cargando con dureza contra o portavoz socialista, ao que acusou de precipitación e de falta de rigor á hora de analizar os expedientes municipais. Neste sentido, reprochou a Pazos que, ao seu xuízo, optase por "chamar a atención" sen afondar nos datos nin coñecer o funcionamento interno do persoal municipal, o que, segundo afirmou, acaba danando a imaxe da política e da función pública.
Ramallo recoñeceu que a Administración "non é perfecta" e que sempre existen aspectos mellorables, pero defendeu a xestión actual do Concello e asegurou que se está traballando na modernización da administración municipal e na súa adaptación a novas necesidades, comparando de forma favorable a situación actual con etapas anteriores.
En canto ás horas extraordinarias, a alcaldesa admitiu que nalgúns servizos son máis elevadas do desexable, aínda que recalcou que se trata de servizos básicos onde a presencialidade, a dispoñibilidade e a atención continua á cidadanía son imprescindibles. Neste apartado citou ás brigadas municipais de obras, augas, electricidade, cemiterios ou instalacións deportivas, así como á Policía Local, cuxos efectivos traballan a quendas, incluídas fins de semana e festivos.
Ramallo quixo poñer en valor a "lealdade, compromiso e dedicación" destes traballadores municipais, sinalando que as horas extra permiten responder as necesidades da poboación e, ao mesmo tempo, complementar os salarios dos empregados. Ao seu xuízo, cuestionar publicamente ese esforzo resulta "feo" e pouco construtivo.
Finalmente, a alcaldesa reclamou unha oposición que achegue solucións en positivo e lembrou que Manuel Pazos foi o único concelleiro da oposición con responsabilidades de goberno no pasado, instándoo a actuar con maior prudencia nas súas críticas.