A Concellería de Servizos Sociais de Cambados convocou os veciños do municipio a participar nunha concentración pacífica que terá lugar este mércores, 24 de xuño, coincidindo coa festividade de San Xoán.
O acto desenvolverase ás 12:00 horas do mediodía xusto diante da Casa Consistorial. A iniciativa persegue visibilizar o rexeitamento social a calquera tipo de violencia exercida sobre a infancia e poñer o foco na necesidade dunha implicación colectiva para protexer aos menores.
O acto central desta convocatoria pública consistirá na lectura dun manifesto institucional que leva por lema "Conciencia hoxe, protección sempre". Desde a organización municipal sinalan que a educación, o respecto e a colaboración cidadá son as ferramentas básicas para construír unha contorna onde os nenos, nenas e adolescentes poidan medrar sen desamparo.
Segundo as análises da Xunta de Galicia, unha parte importante dos casos de malos tratos contra a infancia non chegan a saír á luz pública nin a ser detectados polas institucións.
As dificultades do propio menor para comunicar a situación que vive e o feito de que, ás veces, os titores estean implicados de forma directa ou indirecta provocan que estas realidades queden no ámbito do anonimato.
As autoridades lembran que a falta de atención ou a desprotección emocional son tamén formas de violencia que poden deixar secuelas permanentes se se estenden no tempo.
O teléfono de atención á infancia da Xunta de Galicia (116 111) funciona de xeito gratuíto as 24 horas do día.
A través desta liña, profesionais especializados encárganse de ofrecer asesoramento e de trasladar de maneira urxente cada situación aos organismos competentes.