A Audiencia Provincial de Pontevedra acaba de confirmar unha sentenza previa do Xulgado de Menores de Pontevedra pola que se condena a unha menor de Marcón como autora de dous delitos de denuncia falsa por presentar, xunto á súa nai, varias denuncias falsas por violación, ameazas e violación de morada contra tres veciños de Monte Porreiro de 16, 20 e 22 anos. Aseguraba que os tres a violaran en grupo e un deles, ademais, ameazáraa por Instagram e entrara na súa casa sen permiso, pero inventouse todos os feitos.
A condena implica a súa asistencia a un centro de día durante 12 meses e o pago de diversas indemnizacións aos mozos aos que denunciou, 1.200 euros a un, 700 a outros e 600 ao menor. Estes pagos deberán facelo, no seu nome, os seus pais.
Esta moza sentou no banco dos acusados do Xulgado de Menores de Pontevedra o ano pasado xunto á súa nai (como responsable civil subsidiaria) por presentar varias denuncias contra os tres mozos por agresión sexual, ameazas e violación de morada. Todas as denuncias foron arquivadas por diversos xulgados e a moza chegou a recoñecer finalmente que non sucedera nada, pero o caso chegou agora a xuízo porque as familias dos mozos denunciaron a nai e filla.
O Xulgado de Menores condenouna en primeira instancia, pero o avogado de dous dos mozos, que son irmáns, recorreu ante a Audiencia Provincial pedindo unha condena maior para a moza. Agora, tras revisar o caso, a sección segunda do tribunal provincial ha confirmado a condena.
Esa sentenza, adiantada por Alfredo López Penide en La Voz de Galicia e á que tivo acceso PontevedraViva, considera probado que en setembro de 2016 a menor denunciou aos tres mozos inventando delitos de agresión sexual que aseguraba que se produciron no verán do ano 2015, sen poder concretar a data exacta, no domicilio dos dous acusados maiores de idade en Monte Porreiro. Aseguraba que, tras amordazala e suxeitala fisicamente, os tres violárana.
Tamén en setembro de 2016, segundo declara probado a sentenza, a menor creou unha conta de Instagram co fin de enviarse mensaxes a ela mesma baixo a aparencia de ser un dos mozos aos que acusaba, escribindo mensaxes nos que figuraban expresións constitutivas de delitos de ameazas, e nos que se autoinculpaba de entrar na súa vivenda, cometendo delito de violación de morada.
Estes feitos, que agora se demostrou que foron froito da súa invención, foron denunciados pola nai da menor na Comisaría da Policía Nacional de Pontevedra e investigados e chegou a ditarse unha orde de afastamento para un dos mozos, aínda que finalmente a causa tamén acabou arquivada.
A menor presenta un atraso mental leve e un patrón desadaptativo de personalidade que lle provoca unha afectación parcial da capacidade volitiva, de modo que se lle aplicou unha circunstancia atenuante á hora de aplicarlle a pena.