Condenado a 200 euros por ameazar un edil do PSOE da Lama con facerlle unha gravata colombiana

O Xulgado de Instrución número 2 de Pontevedra condena a conduta do veciño da Lama Germán Piñeiro Teodosio ao intimidar o concelleiro do PSdeG-PSOE neste municipio, Enrique Vaqueiro, a través do Facebook da súa noiva con facerlle unha gravata colombiana, isto é, unha brutal forma de tortura que consiste en cortar a garganta a alguén, sacarlle a lingua por aí e deixala colgando.

Unha sentenza ditada esta semana considera a Germán Piñeiro autor dunha falta de ameazas por este comportamento e imponlle o pagamento dunha multa de 200 euros (20 días a razón de 10 euros diarios).

Durante o xuízo celebrado nos xulgados da Parda, o propio Germán Piñeiro recoñeceu que publicou no muro da rapaza en Facebook a seguinte frase textual "CON QUE MIRE OUTRA MERDA NO FACEBOOK FALANDO DE MEU IRMAN O QUE FALE BOULLE FACER UNHA CORBATA COLONBIANA ASIQUE VEDE E CALADE GILIPOLLAS".

Notificada a sentenza, Enrique Vaqueiro manifesta a súa "total satisfacción" co "funcionamento da xustiza" e esixe ao alcalde e presidente do PP da Lama, Jorge Canda Martínez e ao presidente do PP de Pontevedra, Rafael Louzán, "a expulsión do partido do condenado".

Vaqueiro recorda aos líderes do PP que esta mesma semana esixiu a renuncia do concelleiro do BNG de Cambados Xaquín Charlín por un insulto machista ao Vicepresidente do Goberno, Soraya Sáez de Santamía, e que a ameaza do agora condenado é "cando menos, igualmente reprobable".

O edil socialista e a súa noiva, Tamara Pacheco, acudiron á Garda Civil e, máis tarde, ao xulgado, a raíz da situación que viviron nos días posteriores á publicación en PontevedraViva, o martes 19 de febreiro, dunhas declaracións nas que denun-ciaba que o tenente de alcalde da Lama e irmán do agora acusado, Juan Carlos Piñeiro Teodosio, cobrou "ás agachadas" a paga extra de nadal á que públicamen-te había renunciado.

Unha vez que o xulgado resolveu o caso, Enrique Vaqueiro considera que o tenente de alcalde da Lama "se ten un pouco de dignidade, debería devolver a paga extra cobrada e dimitir do seu cargo inmediatamente". Ademais, sinala que "confío plenamente en que, por fin, con este antecedente, exista unha normalidade democrática no Concello da Lama".