O Tribunal de Instancia de Cambados considerou autor dun delito leve de lesións a un home de 33 anos por coller do pescozo e tirar ao chan un menor de dez anos que xogaba ao balón co seu fillo nun parque de Portonovo.
Así, condénano ao pago dunha multa de 900 euros e dunha indemnización ao menor de 140 euros por prexuízo persoal básico e outros 60 euros máis por dano moral. De igual forma terá que pagar 256,87 euros ao Servizo Galego de Saúde pola asistencia médica prestada.
Segundo a sentenza condenatoria, quedou probado que houbo insultos previos por parte do adulto cara ao menor e dá credibilidade á versión da denunciante, a nai do neno agredido. Ela e dúas testemuñas "viron o pescozo do menor arroibado". A muller afirmou que o neno presentaba lesións no pescozo e que o atendeu un facultativo 38 minutos despois dos feitos.
A esas declaracións engádese un informe do médico forense "que acredita a existencia das lesións, a compatibilidade co nexo causal e o resultado".
A sentenza recolle que "non ten lóxica que un menor de 10 anos inventase este relato e sexa corroborado por un grupo de nenos de pouca idade" e que é "significativo que a reacción dos menores ao ver o inaceptable comportamento do denunciado coa vítima fora ir correndo a avisar as súas nais e persoas maiores de idade".
No fallo xudicial tense en conta o abuso de superioridade pola diferenza de idade e o temor ocasionado ao neno que tardou unha semana en volver ao parque; un emprazamento que describe como "a súa contorna segura".
A sentenza non é firme e pode ser recorrida ante a Audiencia Provincial.
Engade Pontevedra Viva como fonte preferida de Google de balde
Mantente informado coas últimas noticias de actualidade.