Un condutor resultou ferido tras caer co seu coche por un terraplén en Cuntis.
O suceso rexistrouse ás sete e media da mañá en Mesego, segundo informou o 112 Galicia.
Foron efectivos de Protección Civil de Cuntis os que, en primeira instancia, advertiron de que o condutor sufrira este accidente.
Os servizos de emerxencia inicialmente pensaron que serían necesarios medios para excarcerar ao condutor, porque seguía no interior do vehículo.
Para iso, desde o 112 mobilizaron a bombeiros do parque comarcal do Salnés.
Con todo, bastou a axuda dos equipos de emerxencias para subir ao ferido até a estrada e recibir alí os primeiros coidados dos profesionais sanitarios.
Despois, foi evacuado nunha ambulancia de Urxencias Sanitarias de Galicia-061 até un centro hospitalario.
Até o lugar acudiron, ademais dos bombeiros, axentes da Garda Civil de Tráfico.
