O luns 22 de xullo é a data escollida polo persoal da empresa Valoriza Ambiental, concesionaria do servizo da limpeza viaria, para iniciar unha folga indefinida no municipio de Poio.
A decisión, adoptada en asemblea, é consecuencia da falta de acordo na negociación do convenio colectivo, que permanece sen revisar desde o ano 2019, segundo manifesta Carlos Corredoira, responsable de Servizos á Comunidade UXT-SP.
Neste 2024 celebráronse dúas reunións entre os representantes dos traballadores e a empresa sen que se alcanzasen acordos.
O representante sindical indica que os salarios seguen desactualizados cunha diminución económica de máis dun 17%.
"Esta situación é insostible, todos nós tamén sufrimos o incremento de prezos destes últimos anos, o que leva a ter uns salarios non renovados e desacordes cos custos de vida", indica Corredoira.
Sinalan desde o comité de empresa que, fronte a esta paralización que se produce en Poio, a maioría de convenios de limpeza están a ser actualizados, sobre todo os de Valoriza.
Entenden que a situación en Poio supón un "agravio" e desde a representación sindical indican que ata esa data tentarán retomar as negociacións para lograr un acordo e evitar un prexuízo á cidadanía.