O grupo municipal do PSdeG-PSOE de Poio, que lidera Gregorio Agís, lanza unha crítica directa contra a xestión do actual goberno local do PP tras a convocatoria dunha reunión informativa na Caeira.
Segundo os socialistas, o alcalde Ángel Moldes utiliza este encontro veciñal para presentar como iniciativas propias unha serie de proxectos que xa foran redactados e comprometidos durante o anterior mandato, no marco do contrato de concesión da auga, e que permaneceron paralizados dende o cambio na alcaldía.
A formación socialista sostén que durante os últimos tres anos non se executou ningunha actuación estrutural de relevancia nin na Caeira nin en Boavista.
Denuncian unha "inacción absoluta" tanto no mantemento ordinario como na mellora da mobilidade e servizos.
Para o PSdeG, o atraso deliberado destas obras non foi casual, senón que serviu para xustificar unha "suba alarmante" das tarifas da auga, trasladando á veciñanza o custo dunha xestión que cualifican de deficiente.
Un dos puntos máis críticos sinalados polos socialistas é a situación do contrato de concesión da auga. Malia estar operativo e prorrogado no pasado mandato, o PSdeG advirte que actualmente se atopa caducado tras tres anos de goberno de Moldes sen que se acadase unha solución definitiva.
Entre as actuacións que os socialistas consideran afectadas pola parálise municipal figuran as melloras previstas para as rúas San Antoniño, Río Miño, Illa de Ons e Illa de Tambo.
O grupo da oposición sinala que, ata o momento, a única intervención visible foi o asfaltado no contorno do novo vial de Río Outavén, Río Sil e Río Umia, creado no anterior período de goberno, unha medida que consideran insuficiente e motivada unicamente polas recentes queixas veciñais.
O PSdeG de Poio considera que o alcalde está a realizar "escenificacións políticas" para maquillar a falta de resultados.
Por este motivo, os socialistas esixiron publicamente transparencia total sobre o estado real do contrato da auga e os motivos da súa caducidade.
Tamén instan o goberno local a presentar un calendario real de execución para as obras pendentes e a explicar o impacto que as subas tarifarias están a ter nas economías domésticas das persoas residentes en Poio.