Este mércores 5 de novembro, o Pazo Provincial da Deputación de Pontevedra acollerá a xornada educativa "Educación e benestar emocional: creando espazos saudables", organizada por Cruz Vermella.
A xornada, que se desenvolverá de 09.00 a 13.00 horas, xa conta cunha participación próxima ao centenar de persoas procedentes de distintos sectores relacionados coa educación e o benestar infantil.
A apertura da xornada correrá a cargo de Paula Bouzós Barros, deputada de Benestar Social e Igualdade, e de Gonzalo Iglesias Rial, vicepresidente de Cruz Vermella.
Durante a mañá, as persoas asistentes poderán asistir a dúas ponencias de referencia: "Axudando a medrar cando cambian os marcos", impartida por Xandre García Caballero, psiquiatra especializado en saúde mental infanto-xuvenil, e "Estratexias para mellorar o benestar emocional na infancia", da psicóloga e escritora Begoña Ibarrola, un referente en educación emocional.
A programación tamén inclúe unha actividade demostrativa con cans de terapia, organizada por IncrescenTO, un equipo interdisciplinario que utiliza a terapia asistida con animais para favorecer o benestar físico, emocional e social das persoas.
O seminario está dirixido especialmente a alumnado de primaria e secundaria, así como a profesorado, familias e entidades do terceiro sector, co obxectivo de sensibilizar sobre a importancia da saúde mental e dotar aos axentes educativos de ferramentas e estratexias de prevención para mellorar o benestar emocional tanto dos menores como de si mesmos.
Esta xornada enmárcase no proxecto "Conta con nós", unha iniciativa posta en marcha en 2024 e financiada pola Deputación de Pontevedra, que xa atendeu a máis de 400 persoas entre alumnado, familias e docentes.
A través de talleres, charlas e actividades comunitarias, o programa busca fomentar a intelixencia emocional como ferramenta clave para afrontar os retos diarios e fortalecer unha educación máis saudable e consciente.