Axentes da Policía Local de Poio daban o alto ao condutor dun vehículo ás 00.10 horas deste luns despois de observar que o turismo circulaba sen iluminación de cruce pola Avenida de Porteliña.
Someteuse ao condutor a unha proba de alcoholemia e os axentes comprobaron que o resultado era positivo.
O vehículo tamén quedaba inmobilizado ao detectar que as luces non funcionaban.
Desde a Policía Local de Poio lembran que conducir cunha taxa de alcol superior á permitida se castiga cunha sanción de ata 1.000 euros e a retirada de entre 4 e 6 puntos do permiso de conducir. Se a taxa supera o 0,60 Mg de alcol en aire expirado pasaría a ser unha infracción penal.
Sinalan que no caso de detectar consumo de drogas se sanciona cunha multa de mil euros e a perda de seis puntos.