Durante a Xunta de Goberno extraordinaria celebrada no Grove aprobouse a licitación dos contratos necesarios para a celebración da próxima Festa do Marisco, que inclúen o subministro de viño, os servizos de cafetería, de artesanía e de agasallos.
A festa vai celebrarse desde o xoves 2 de outubro ao domingo 12 do mesmo mes.
Como novidade salientable, este ano as condicións da cafetería cambian de maneira radical debido aos incumprimentos rexistrados na pasada edición en relación cos horarios de música e peche. Así, establécense as seguintes normas:
-
O horario de apertura será de 11:00 a 00:00 horas, debendo estar pechada obrigatoriamente á medianoite.
-
A música en directo só estará permitida en franxa de 17:00 a 19:00 horas.
-
Non se permitirá música durante os ensaios nin nos concertos programados da Festa do Marisco.
Deste xeito, o Concello quere garantir unha mellor convivencia e un correcto desenvolvemento tanto dos servizos de hostalería como da programación cultural e musical da festa máis emblemática do Grove.
APROBADAS ACTUACIÓNS URBANÍSTICAS
O Goberno local aprobou tamén este mércores na Xunta de Goberno extraordinaria a licitación de dúas importantes actuacións urbanísticas que permitirán renovar o aspecto de dúas rúas céntricas do municipio.
Por unha banda, licítase a reforma integral da rúa Lepanto, cun orzamento total de 225.000 euros.
A intervención inclúe a renovación completa das redes de abastecemento e saneamento, a instalación de nova iluminación, a creación dunha plataforma única e a renovación total do pavimento, seguindo o modelo implantado xa en rúas como Entrehortas ou a rúa Escura.
O alcalde anunciou que manterá unha reunión cos veciños unha vez adxudicadas as obras, para organizar e coordinar a súa execución.
Ademais, tamén se licita a actuación na rúa Hortos, onde xa estaba previsto o asfaltado, a nova iluminación e unha senda peonil.
Detectada a pésima situación das redes de abastecemento e saneamento, o proxecto amplíase agora para incluír a súa substitución total, garantindo así unha reforma integral que beneficiará tanto a veciñanza como a circulación peonil.
O prazo de presentación de ofertas é de 13 días, co obxectivo de que a mediados de setembro as obras queden adxudicadas para comezar as obras no último trimestre do ano.