A Policía Local de Poio denunciou un ciclista que na tarde do luns foi sorprendido conducindo bébedo e cunha condución "anómala" que poñía en perigo a seguridade viaria.
Segundo a información facilitada pola Policía Local, sobre as 21:45 horas da tarde varias persoas alertaron aos axentes da presenza deste ciclista que circulaba pola avenida de Encoirados.
Ademais, o 112 Galicia alertounos de que este ciclista tivera un accidente con saída de vía e, como resultado, tiña feridas leves.
Os axentes trasladáronse ao lugar e someteron ao ciclista ás probas regulamentarias de alcol, nas que deu un resultado de 1,20 miligramos de alcol por litro de aire expirado isto é, case cinco veces o límite establecido para conducir vehículos a motor.
Ata o lugar tamén se achegou unha ambulancia do 061, pero o ciclista negouse a recibir asistencia sanitaria.
O ciclista foi denunciado e a infracción constitúe unha sanción de 1.000 euros e a inmobilización da bicicleta.