A Sociedade Española de Ornitoloxía (SEO Birdlife) denunciou á Deputación de Pontevedra pola "destrución intencionada" dunha colonia de cría do cirrio común, durante as obras de rehabilitación das ruínas de Santo Domingo.
Segundo informou SEO Birdlife estes traballos están a causar "un gran prexuízo á especie" xa que o birrio se encontra "en plena época de aniñamento despois de chegar dunha longa viaxe dende a África subsahariana".
Durante estes días estase a retirar a estada que cubría a fachada das ruínas de Santo Domingo que afrontan deste modo a etapa final das obras despois de meses de longa tramitación administrativa dos oportunos permisos e autorizacións.
Precisamente para os ornitólogos o momento do ano elixido é "inadecuado", unha circunstancia da que aseguran, foron advertidos os responsables da Deputación ao inicio da reforma. "Nestas reunións pedimos o aprazamento da execución das obras de restauración para que non interrompesen a cría dos cirrios e propuxemos diversas medidas compensatorias para manter a colonia, como a colocación de niñeiros artificiais, sen ter resposta firme por parte da Deputación Provincial".
Os ornitólogos explican que o cirrio común é unha especie protexida "moi beneficiosa para o ser humano por consumir millóns de insectos" e recalcan que é un animal "que non dana os nosos monumentos, podendo compatiblizarse perfectamente o mantemento do noso patrimonio histórico co noso patrimonio natural, simplemente adoptando unhas sinxelas medidas", afirman.