A vivenda unifamiliar en estado de abandono que está situada no entroncamento da rúa Alfonso X o Sabio coa futura continuación de Fernando II será demolida.
Tras varios requirimentos desatendidos e unha orde de execución ditada no ano 2020, a propiedade procederá a realizar unha demolición controlada.
Os traballos, que contan cun orzamento de 21.500 euros, incluirán a limpeza completa da parcela, a retirada de materiais con amianto e a instalación dun peche perimetral de seguridade.
O inmoble, segundo o responsable da área de urbanismo, Alberto Oubiña, tiña un risco estrutural "importante" e unha falta de "condicións mínimas" de habitabilidade e salubridade.
"Ten un estado de abandono bastante prolongado e patoloxías severas", engadiu.
Até agora, os propietarios de inmobles nesta localización atopábanse cun problema que paralizaba calquera edificabilidade.
"No momento inicial non se podíasconstruír", explicou Oubiña, de forma que se derrubaban a vivenda "quedaba derrubada e non podían facer nada.
Pero a comisión de urbanismo aprobou recentemente un novo criterio interpretativo para desbloquear a situación destas parcelas e ter a posibilidade de construír nelas.
Con este novo criterio, permítese a construción de novos edificios a ambos os dous lados da vía, que poderán contar con planta baixa comercial, catro alturas e aproveitamento baixo cuberta, completando o desenvolvemento urbanístico deste ámbito.
En todo caso, o edil de urbanismo matizou que a conexión completa da rúa Fernando II non será posible por agora.
Será cando se proceda á derriba do establecemento comercial, o Cash Galicia, que interrompe o trazado.
Iso si, mentres tanto, este novo criterio permitirá xa urbanizar o tramo que falta cara á rúa Alfonso X o Sabio.