Unha operación conxunta da Garda Civil e a Policía Nacional permitiu desartellar unha organización criminal dedicada ao tráfico de drogas que operaba en Galicia e con ramificacións noutros puntos de España.
O operativo, bautizado como HELO/KALIDAS, saldouse con 11 detidos, todos homes de entre 41 e 52 anos e con antecedentes, e a incautación de importantes cantidades de estupefacientes, armas e material loxístico.
A investigación, iniciada en maio de 2024, foi desenvolvida polo Equipo de Delincuencia Organizada e Antidroga (EDOA) da Garda Civil de Pontevedra, xunto con distintas unidades da UDYCO e a Brigada Central de Estupefacientes, da Policía Nacional.
Durante máis dun ano, os axentes seguiron a pista dun armazón asentado principalmente nas Rías Baixas, con conexións en localidades como Caldas de Reis, Vilagarcía de Arousa ou a Illa de Arousa, e con extensión até Bilbao.
Un dos momentos clave da operación produciuse o 2 de outubro de 2025, cando os investigadores interceptaron un vehículo en Ribadeo que ocultaba nun dobre fondo cinco quilos de cocaína e outro cinco de haxix.
O condutor, un veciño de Vilagarcía de 52 anos, foi detido no acto.
O rexistro posterior do seu domicilio permitiu descubrir un importante alixo con 3,7 quilos de heroína, 5,4 quilos de cocaína, 10 quilos de haxix, dous quilos de sustancia de corte e dous teléfonos satelitales.
Tras pasar a disposición xudicial, decretouse o seu ingreso en prisión.
As pescudas continuaron e levaron aos axentes até un punto de almacenaxe utilizada pola organización, onde se incautaron outros 1,3 quilos de heroína, 600 gramos de cocaína e 100 gramos de haxix.
A fase final da operación desenvolveuse cun amplo despregamento policial que incluíu 12 entradas e rexistros simultáneos, dous deles en Bilbao.
Nestes rexistros interviñéronse 9,5 quilos de cocaína, medio quilo de heroína e case 20.000 euros en efectivo, ademais dun notable arsenal con tres armas curtas (dúas pistolas e un revólver), once escopetas e abundante munición de distintos calibres.
O dispositivo tamén permitiu requisar dúas embarcacións de alta velocidade (unha delas equipada con tres motores fueraborda), catro vehículos, 18 teléfonos móbiles, equipos informáticos, básculas de precisión, unha envasadora ao baleiro, un inhibidor de frecuencia e outros elementos habitualmente asociados a redes de narcotráfico. Entre os obxectos intervidos figura mesmo un reloxo de alta gama.
En total, a cantidade de droga incautada ascende a 5,5 quilos de heroína, 20,5 quilos de cocaína e 15,1 quilos de haxix, ademais de dous quilos de sustancia de corte, o que evidencia a capacidade de distribución da organización, tanto no ámbito autonómico como nacional.
As detencións practicáronse en diferentes puntos do país, entre eles León, Vigo, Caldas de Reis, Vilanova de Arousa, Vilagarcía e Bilbao.
O operativo contou co apoio de diversas unidades especializadas, incluíndo equipos de intervención, guías caninos e medios aéreos.
A maxistrada da sección civil e de instrución do Tribunal de Instancia de Caldas de Reis, praza 2, decretou o ingreso en prisión provisional, comunicada e sen fianza, dun dos cinco detidos que pasaron este venres á disposición xudicial.
Os outros catro foron postos en liberdade e, a dúas deles, como medidas, impúxolles a prohibición de saída do territorio nacional, a retirada do pasaporte e a obrigación de comparecer ante o tribunal de instancia semanalmente.
A causa séguese por un delito contra a saúde pública, pertenza a grupo criminal e tenencia ilícita de armas, segundo informou o Tribunal Superior de Xustiza de Galicia.