Deteñen cinco furtivos en Poio con 12 quilos de ameixa

Poio
26 de xullo 2020

Trátase dun grupo organizado que extrae a ameixa en sacos e agáchano en diferentes puntos do monte. Logo, recupera o molusco e o vende ilegalmente en bares e restaurantes. Dos 12 quilos incautados, seis deles eran de tamaño antirregulamentario  

A Policía Local de Poio incauta 12 quilos de ameixa
A Policía Local de Poio incauta 12 quilos de ameixa / Policía Local de Poio

A Policía Local de Poio incautou, na tarde do sábado, 12 quilos de ameixa que foi extraída de maneira ilegal.

Segundo informan os axentes, foron avisados de que nas proximidades da praia da Illa dos Ratos varios furtivos estaban extraendo o molusco de forma ilegal, polo que dispuxeron un operativo para identificalos.

Cinco dos furtivos eran veciños de Poio e, nun primeiro momento, non levaban o molusco xa que o modus operandi é que extraen a ameixa en sacos e agáchano en diferentes puntos do monte. 

Trátase dun grupo organizado que recupera de novo o molusco do monte e logo o vende ilegalmente en bares e restaurantes. Finalmente localizáronse 12 quilos, seis deles de tamaño antirregulamentario.