A Policía Nacional localizou e detivo en Pontevedra un narcotraficante que figuraba como fuxido da xustiza italiana e da española.
De nacionalidade española, está considerado un dos líderes dunha organización criminal dedicada ao tráfico de drogas a nivel internacional e, tras fuxir de Italia, tívose coñecemento de que podería estar escondido en España.
Os investigadores italianos solicitaron a colaboración da a Policía Nacional en España nada máis coñecer que o fugitivo podería fuxir a este país.
Por este motivo, activáronse rapidamente os mecanismos de cooperación policial internacional.
Recibida a alerta, a Policía Nacional iniciou unha investigación que concluíu coa súa localización en Pontevedra.
Os axentes montaron un dispositivo de vixilancia na vivenda na que residía na parroquia pontevedresa de Cerponzóns e alí foi finalmente detido.
O home tiña en vigor unha orde de detención e ingreso en prisión ditada por un tribunal itialiano por un delito de tráfico de drogas polo que foi condenado no ano 2017.
Foi condenado a 30 anos de prisión como parte dunha organización dedicada a transportar grandes cantidades de cocaína desde Colombia a Italia entre os anos 2014 e 2015.
Ademais, ten en vigor unha orde de detención e ingreso en prisión dictdada pola Audiencia Provincial de Pontevedra tamén para cumprir outra pena pendente de 10 anos de prisión por outro delito de tráfico de drogas.