Un home era detido esta pasada fin de semana en Pontevedra como presunto autor dun delito de violencia de xénero.
Os feitos producíronse na tarde do domingo 15 de xuño, cando a nai da vítima alertou á central de comunicacións da Policía Local de que a súa filla estaba a ser agredida pola súa parella no domicilio familiar.
Cando os axentes chegaron ao lugar, comprobaron que a muller xa abandonara a vivenda, quedando só o presunto agresor no interior. Unha patrulla policial logrou localizar a vítima poucos minutos despois nas inmediacións da residencia.
Segundo as declaracións recollidas e os indicios observados polos axentes, o incidente comezou cun xesto cotián: a muller tentou coller en brazos á súa filla pequena, o que desencadeou unha discusión que escalou rapidamente.
O home acabou propinando unha patada na perna á súa parella e dirixíndolle insultos despectivos, todo isto na presenza da menor.
Tras valorar a situación, os axentes procederon á detención do home como presunto autor dun delito de violencia de xénero.
A vítima foi trasladada a un centro hospitalario para ser atendida tanto das lesións físicas como do impacto psíquico sufrido, mentres que a menor quedou baixo a custodia dun familiar.
Este caso prodúcese dúas semanas despois da última detención por parte da Policía Local por unha situación similar cando un home agredía á parella na vía pública e os axentes foron alertados pola veciñanza.