Este luns celebrouse o Día do Neno no que as atraccións valeron máis baratas. Os máis pequenos da casa gozaron a tope desta xornada nun último esforzo para as maltreitas carteiras dos avós despois de toda unha semana de festa.
O scalextrix, as camas elásticas, os coches eléctricos, as tómbolas, o touro mecánico, a noria, estaban entre o máis demandado.
Con todo, as longas colas rexistradas este luns non resarcen aos feirantes que, un ano máis, volveron a falar dun ano frouxo queixándose polos escasos ingresos obtidos debido á baixada de clientes.
Que se a calor, que se a crise, ningún dos feirantes fixo autocrítica para confesar que os prezos das fichas tamén eran caros. Ata catro euros montar en aparellos como a noria ou o "Explorer".
O Concello, que xa traballa na Feira Franca, valorou que a Semana Grande da Peregrina foi das máis multitudinarias que se lembran.
Despois deste día extra toca recoller para poder reabrir as rúas ao tráfico este mércores.