Este luns 21 de outubro iníciase unha nova fase dos traballos da ponte do Burgo que incluirá a renovación de todos os servizos na avenida de Domingo Fontán, no treito comprendido entre Martín Códax e a avenida da Coruña. Esta fase da obra suporá o peche dun dos carrís de Domingo Fontán, entre a ponte das Correntes e avenida de Compostela e nesa dirección.
As fases previstas na execución da obra van realizándose dentro dos prazos previstos e, toda vez rematada a cabeceira sur, preparado o taboleiro para instalar a varanda e posto en marcha todo o traballo na cabeceira norte, a seguinte fase suporá "o traballo gordo de renovación de servizos que se vai facer nesta obra", segundo explicou esta semana o concelleiro de Obras, Demetrio Gómez.
O proxecto consiste en repoñer todos os servizos que hai na rúa: a rede de fecais, pluviais, subministro de auga, rede semafórica, rede de comunicación e rede eléctrica e de alumeado público.
A principal novidade radica na técnica que se utilizará na renovación da rede xeral de subministro de auga aos concellos da ría, que en vez de facerse abrindo unha gabia e cambiando as canalizacións, realizarase a través dun 'encamisado', unha técnica que se utilizará por primeira vez en Pontevedra.
Esta decisión chega despois dunha proposta da empresa que está a executar a obra, E.C. Casas, froito dun labor de investigación da propia empresa e dunha avaliación exhaustiva por parte dos servizos técnicos municipais para determinar a súa eficacia.
Esta proposta técnica, moito menos agresiva que instalar un tubo novo, consiste en abrir un pozo de entrada e outro de saída para inserir por dentro dun tubo de fibrocemento FC 600 milímetros, un tubo de polietileno de 560 milímetros que vai soldado por termofusión, utilizando o sistema Relining ou entubado interior mediante tiro ou empuxe.
PLAN DE TRÁFICO
A renovación da rede de subministro de auga con esta técnica novidosa evita que teña que cortarse ao tráfico a totalidade da avenida Domingo Fontán. O peche só afectará a un dos carrís de circulación entre a ponte das Correntes e a ponte do Burgo. Cortarase o carril dereito para todo o tráfico agás residentes e servizos e cortarase para todo tipo de tráfico desde Martín Códax.
O sentido de circulación establecerase desde a ponte do Burgo cara a ponte das Correntes (dirección Poio). En sentido inverso, o tráfico será desviado desde a ponte das Correntes cara o centro da cidade.