Dous homes de 86 e 75 anos falecidos no Complexo Hospitalario Universitario de Pontevedra sumáronse nos dous últimos días ao balance de vítimas mortais da covid-19 na área sanitaria de Pontevedra e O Salnés.
Segundo o último balance da Consellería de Sanidade, un home de 86 anos que estaba ingresado no Hospital Montecelo faleceu o venres 2 de abril e outro de 75 faleceu no mesmo centro este sábado 3.
Os dous falecidos tiñan patoloxías previas ao diagnóstico da covid-19 e elevan a 166 o total de vítimas mortais da pandemia na área sanitaria pontevedresa.
Sanidade deu conta este sábado de tres novas vítimas mortais da pandemia en Galicia. Ademais dos dous falecidos en Pontevedra, reporta a morte dunha muller de 88 anos que estaba ingresada no Complexo Hospitalario Universitario de Santiago de Compostela. Faleceu este sábado e tamén tiña patoloxías previas.