A Subdelegación do Goberno en Pontevedra sumouse á conmemoración do Día da Bandeira Nacional de Ucraína coa colocación de dúas bandeiras ucraínas nos balcóns do edificio para lembrar e darlle visibilidade ao conflito actual no país. Permanecerán durante toda a fin de semana.
O subdelegado do Goberno, Abel Losada, mantivo un encontro cun grupo de refuxiados e refuxiadas de Ucraína residentes na provincia e pertencentes á Asociación Girasol, que preside Marta Skyba.
Durante o encontro, trasladoulles a solidariedade do Goberno de España co pobo ucraíno e reiterou "o compromiso absoluto co seu país, que non está defendendo só a súa propia existencia, senón os valores democráticos e a integridade de Europa".
Losada fixo fincapé no apoio do Goberno a Ucraína "ante un proceso de invasión de fronteiras que non se coñecía desde a Segunda Guerra Mundial" e amosou a súa sorpresa ante o feito de que "forzas políticas de distinto signo se aproximen máis ao agresor que aos agredidos".
A asociación trasladoulle as súas demandas, que teñen que ver, principalmente, coa tramitación de permisos de estranxeiría, mercado laboral ou o acceso á vivenda, ademais da barreira idiomática, especialmente nas persoas maiores.
Desde a Subdelegación xa se realizaron xestións para tratar de axilizar os diferentes procesos de tramitación administrativa. Nesta liña, Losada recordou que as persoas desprazadas pola guerra que contan cun permiso especial de residencia poden seguir solicitando a Protección Temporal en todos os países membros da Unión Europea, un trámite que será prorrogable ata o 4 de marzo de 2025.