As obras de renaturalización do tramo do río Gafos que discorre por Campolongo comezarán no primeiro cuadrimestre de 2026. "Esa é a nosa idea", avanzou este mércores o alcalde de Pontevedra, Miguel Anxo Fernández Lores.
Serán dúas empresas de Pontevedra, COVSA e EC Casas, que se presentaron en UTE a esta licitación, as que executen esta actuación. Farano por case 4,2 millóns de euros, uns 400.000 euros menos dos orzados inicialmente.
"Estou moi ilusionado con este proxecto", sinalou Fernández Lores, que destacou que servirá para recuperar o tramo "enterrado" do Gafos nos anos 70 e conseguir que toda esta zona teña unha "altísima calidade urbana".
O ámbito recuperado contará con máis espazo natural e con máis arboledo e a solución que se adoptará, segundo o rexedor pontevedrés, reducirá o risco de inundacións na zona.
Ademais, retiraranse todos os colectores próximos ao río mellorando así o seu saneamento e se permeabilizarán as redes de pluviais, de forma que a auga da choiva se poida incorporar á canle do Gafos "sen inconvenientes".
As obras terán un prazo de execución de doce meses.
O alcalde sinalou que "me gusta" que as empresas seleccionadas pola mesa de contratación sexan de Pontevedra porque así "obviamente" se xera emprego na cidade.
Estas dúas compañías, defendeu Miguel Anxo Fernández Lores, traballan "habitualmente" en Pontevedra e fano con resultados "excepcionais". A iso sumou que, ante calquera problema, "hai a quen queixarse" no canto de ter que lidar con "gabinetes de avogados".
Con respecto aos prazos para poder executar a obra con fondos europeos, o alcalde explicou que o proxecto "vai en serio" e nada evitará que non se faga. Se o diñeiro non chega de Bruxelas, engadiu, farase con fondos propios da administración municipal.
"É absolutamente máis razoable que gastar os cartos en avións e en bombas de reloxería", sentenciou Lores, criticando veladamente ao Goberno polo aumento do gasto en material militar.
ASÍ SERÁ O GAFOS EN CAMPOLONGO
O 'destape' do Gafos suporá liberar uns 3.800 metros cadrados do río, entre Alcalde Hevia e Xeneral Antelo Rubín, que agora mesmo están canalizados baixo terra.
Todo o formigón retirado, que será substituído parcialmente por granito perpiaño de cor gris, será triturado para daquela ser utilizado na construción dos camiños e carreiros fluviais.
Con esta proposta crearanse máis de 3.100 metros cadrados de zona arbustiva e 690 metros cadrados de pradaría natural.
Plantaranse 98 novas árbores, duplicando a cifra actual, aos que sumarán 290 plantóns de salgueiro, obtendo uns 700 metros cadrados de cobertura arbórea e creando así grandes áreas de sombra para combater a calor. A maioría das especies serán de folla caduca.
O fito máis impactante sitúase na zona do hórreo de Campolongo, onde se cambiará o curso do río para que sexa curvo, máis natural e favorable para conter a velocidade da auga.
Aquí crearanse uns paseos recreativos cerca do río con árbores e pradaría natural, lembrando a illa que creaba antigamente o Gafos neste espazo e, a maiores, renovaranse os 550 metros lineais que hai de canalizacións obsoletas
Pola súa banda, na zona da escola infantil Crespo Rivas e o colexio de Campolongo instalarase unha protección con varandas de aceiro inoxidable e con franxas vexetais para evitar caídas e haberá unha gran pasarela de 12 metros de ancho, con mobiliario urbano e varios miradoiros.