Coas ameixas a máis de 40 euros o quilo e a centolla xa por 50, os pontevedreses parecen ter reformulado os menús para as comidas e ceas do Nadal.
Así o indican desde a praza de abastos de Pontevedra, onde aseguran que as vendas caeron con respecto ao nadal pasado.
"Estamos a notalo sobre todo na ameixa. Subiu unha burrada, e como hai moi poquita polo temporal e as choivas, dispárase totalmente", explican desde Mariscos Emilio.
Unha semana antes de Noiteboa o quilo véndese a 41 euros, polo que moitos clientes se están decantando por opcións máis económicas.
O que máis se está vendendo é a centolla, todo un clásico destas datas, a pesar de que se aproxima aos 50 euros, mentres que nos peixes unha das alternativas a mellor prezo adoita ser a pescada, aínda que esta vez supera xa os 15 euros o quilo.
"Teño pedidos, pero noto que menos que outros anos", admite a pescadeira de Peixes e Mariscos Montse, que di que os máis previsores compraron xa todo para conxelar en novembro e así escapar das subidas da época festiva.
No mercado pontevedrés teñen a esperanza de que as compras de última hora, que adoitan multiplicarse nos días previos ás datas sinaladas, salven un pouco as vendas.
Subliñan as praceiras que, a pesar de ter moitos encargos para Noiteboa, "ese día colápsase de xente que non reservou nada", algo que confían que ocorra tamén este ano.
Iso si, avisan de que o prezo será aínda máis alto que o desta semana, entre outras cousas, porque a climatoloxía está a complicar o labor de pescadores e mariscadores.
"Non se pode saír a faenar, hai especies que é moi complicado porque hai moita ondada e mar de fondo. Para o percebe está a complicarse a campaña. Trabállase un día un pouco ben e ao día seguinte xa case non poden saír a faenar", afirma o presidente das confrarías galegas.
Ademais, José Antonio Pérez lembra que na ameixa, do mesmo xeito que o mexillón, afectou o episodio de biotoxinas coñecido como marea vermella e hai zonas aínda pechadas á extracción.
En canto ao peixe, o quilo de besugo rolda os 80 euros en lonxa e o de palometa os 100, mentres que o polbo móvese entre os 10 e os 16, en función do seu tamaño. Camarón e cigala andan xa tamén nos 100 euros.