En sete días estará en funcionamento o aparcadoiro do Centro de Saúde de Marín

Marín
03 de maio 2021

Desde o último día de abril están a acometerse os labores de roza e a finais desta semana está previsto que se inicie o formigonado para que entre en funcionamento na segunda semana de maio

Revisión dos muros do aparcadoiro fronte ao Centro de Saúde
Revisión dos muros do aparcadoiro fronte ao Centro de Saúde / Concello de Marín

A parcela situada fronte ao Centro de Saúde de Marín, cedida por Invied ao Concello, converterase a próxima semana nun novo aparcamento público. 

O venres, último día de abril, iniciáronse os labores de roza da leira e, ao longo desta semana, están a realizarse os traballos para arrombar o terreo de maneira que quede habilitado para o seu perfecto uso.

Sobre todo, está a prestarse atención ao reforzo dos muros para garantir a seguridade. A finais desta mesma semana realizaranse os traballos de formigonado.

Serán 40 novas prazas de aparcamento, ao unirse tres parcelas cedidas polo organismo estatal, segundo o goberno local. Con elas tentarase ofrecer unha solución á demanda de zonas de estacionamento nas proximidades do centro asistencial.