Ence anunciou o lanzamento dun plan de competitividade no seu negocio de celulosa, co obxectivo de optimizar procesos e recursos, mellorar a produtividade e reforzar a súa posición no mercado.
O plan de competitividade, que a compañía presentou aos axentes sociais desta unidade de negocio para acordar unha folla de ruta colaborativa, permitiría impulsar a súa eficiencia operativa e racionalizar custos, á vez que fortalecería a súa competitividade.
Esta aposta pola competitividade levaría tamén a adopción de novas tecnoloxías e o reforzo da resiliencia da compañía nun contexto de profunda transformación do sector da celulosa; sector marcado pola elevada volatilidade e o incremento dos custos loxísticos e da madeira en Europa.
Investimentos de 340 millóns de euros
Este novo escenario impulsaría o retorno dos investimentos previstos no marco estratéxico da compañía para o período 2025-2028, nas súas fábricas de Pontevedra e Navia.
En concreto, Ence destinaría, no período de referencia, 340 millóns a diversificar a súa unidade de negocio de celulosa cara a novos mercados, produtos máis sostibles e de maior valor engadido.
Neste sentido, destacarían proxectos como o de descarbonización das biofábricas, a mellora na eficiencia da xestión dos recursos hídricos, a dixitalización e automatización dos procesos ou o impulso ás celulosas especiais que a compañía prevé que representen máis do 60% das vendas de celulosa en 2028.
Sobre este último punto hai que facer referencia ao lanzamento da celulosa fluff para produtos hixiénicos absorbentes, no cuarto trimestre de 2025.
Ence converterase no único produtor europeo de fluff de fibra curta, substituíndo ao de fibra longa. A compañía ofrecerá unha alternativa de fabricación europea con menor pegada de carbono, reforzando a cadea de valor local e a independencia estratéxica de Europa.
Innovación, eixo estratéxico
As iniciativas que Ence poría en marcha responden á firme aposta da compañía pola innovación, eixo estratéxico de cara a ser un actor diferencial no sector e adaptarse ás novas demandas dos seus clientes.