Nesta nova entrega de "A cociña gourmet en conserva" imos elaborar unha receita tradicional de Hawai, a ensalada poke, onde aproveitaremos todos os beneficios dun dos peixes máis exquisitos e demandados: o atún claro.
O atún é un peixe con múltiples propiedades. Destaca a súa achega en proteínas de gran valor biolóxico, así como o seu alto contido en Omega-3. A estas importantes calidades, hai que engadir os beneficios nutricionais da súa presentación en aceite de oliva.
Poke, palabra que en hawaiano significa 'sección' ou 'cortar', é unha ensalada onde se combinan unha variedade de peixes crus, entre os que destaca o atún, con salsa de soia e diversos vexetais como aguacate, cogombro ou algas. Adoita servirse acompañada de arroz. Segundo a cantidade de ingredientes, consumirase como aperitivo ou prato principal.
Para preparar unha deliciosa Ensalada poke con atún claro Pescamar usaremos os seguintes ingredientes:
- 2 latas de Atún Claro en aceite de oliva Pescamar
- 1 cunca de arroz branco cocido
- 2 follas de alga wakame
- 1 ceboliña
- 1 aguacate
- 1 cogombro pequeno
- Salsa de soia
- Zume de lima
- Aceite de sésamo
- Sementes de sésamo
- Sal
- Caiena en po
Preparación:
Colocamos o contido das dúas latas de atún claro Pescamar nun cunco con parte do seu aceite e outra metade de salsa de soia. Mesturamos para que se fusionen os ingredientes. Reservamos.
Rehidratamos as algas wakame nun prato fondo con auga quente uns 10 minutos. Escorrémolas e cortamos en anacos pequenos.
Picamos a ceboliña. Cortamos o cogombro en toros finos. Retiramos a pel do aguacate e o óso e cortámolo en cuarteiróns. Tostamos as sementes de sésamo.
Presentación:
Colocamos no fondo dun bol o arroz branco cocido, o atún claro Pescamar coa salsa na que o deixamos repousar, a ceboliña, as algas e dúas culleradas de salsa de soia. Mesturamos ben.
Engadimos os toros de cogombro e o aguacate, que mollaremos cun pouco de zume de lima.
Regamos cunhas pingas de aceite de sésamo, un chisco de sal, outro de caiena en po e as sementes tostadas de sésamo.
En quince días, os produtos do mar serán de novo protagonistas dunha nova receita de "A cociña gourmet en conserva" de Conservas Pescamar.
Engade Pontevedra Viva como fonte preferida de Google de balde
Mantente informado coas últimas noticias de actualidade.